Min xepart nîşedanga xwe
Aşiyana derd û kulan
Gel bindest goştê xwe dixwe
Sal heftê dû, ro şeş Gulan
Spî xwîna gelan dimêjin
Netewên nexwendî gêj in
Neçê xwefiroş pirbêj in
Zelq û çilm in li ser cilan
Giranbuha bû gengeşî
Cuwan kuştin bê serxweşî
Sedem dijberî kimreşî
Kero dijwar wek filfilan
Sê cuwan hatin ber darê
Temen ji werzê biharê
Kamnegirtî bûn ji yarê
Xwî dabû berê sumbêlan
Dihêjan hezar kişweran
Sirûşt şoreş wek serweran
Numûşê gelê xaweran
Ala rengîn li ser milan
Serok Deniz mîna Mûsa
Destek pirtûk ê dî esa
Eyar şom dijmin pê hesa
Nehiştin bêhn bikin gulan
Eyirandin parlemento
Şewitandin manîfesto
Sê cuwanên wek Ernesto
Hilawîstin ro şeş Gulan
Navê wan danîne fîdan
Deniz li ber marê pûjan
Canemerg Huseyin Înan
Darizandin wek qatilan
Yusuf Aslan bû sêyemîn
Gul û rîhan û yasemîn
Bi wan biheşt rûyê zemîn
Dil xemgîn e ro şeş Gulan
Firmêsk barîn ji baranê
Hin ga hebûn li garanê
Zagongêrê parlemanê
Gêl ji bêhna qurnefilan
Dil dicoşe xwîn bû derya
Çibkim ji gel mîna kerya
Zanist vedike tim derya
Gul geş dibe bi bilbilan
Salê carek salveger e
Esrîn dibarin xwîn ger e
Derman koşîn û tevger e
Berxwedan çek e li milan
Tolhildan e demoqrasî
Ez tewanbarê sîyasî
Peywira min bû rênasî
Dermanê qeyrana dilan
Nîşedanga xwe dixwînim
Zêmarokan dilorînim
Sorfirmêskan dibarînim
Dema roj dibe şeş Gulan
Hem birîndar hem Piştkul im
Derman xela ye dilkul im
Pêxas û serqût bê cil im
Qerqer e dêvla nûcilan
06.05.2024 - WAN
